Trachte verbinde oder d’Bärner Sunntigstracht am grosse Trachte- u Schützeumzug am Münchner Oktoberfest 2023 «… einzig die Umzugsstrecke geht mitten durch München und ist ziemlich lang, ca. sieben Kilometer, also müssten die Schuhe zum Laufen passen.», isch i dere Mail inne gstange, wo mir afangs Früehlig 2023 vor Musiggsellschaft Wahledorf hei wietergleitet übercho. Als Erschts hani da de scho chli ds Lache müesse verha u viellicht geit das euch, mit Blick uf d’Kilometeragab u de bekannte Druckstelle vo eune Trachteschueh o grad ä chli so, wie mir… Die Afrag hingäge vor Musiggsellschaft Wahledorf, ob mir vor Trachtegruppe füf Ehredame ir komplette Sunntigstracht für a gross Trachte- u Schützeumzug am Münchner Oktoberfest im Herbst 2023 chönnte stelle, het mir ä riese Freud gmacht. Was fürne ganz spezielle Ehr üsi Bärner Sunntigstracht a somene Alass go ds präsentiere. Bsungrigs wiu das Jahr ono grad ds 140igste Jubiläum vo der Trachtebewegig in Bayern gfyret wird u so am Umzug ca. 1'400 bayerischi Trachtelüüt mit drbi si gsi. Fantastisch aber o, dass üsi Trachte u üses Bruchtum o vo angerne Kreise, usserhalb vo üsere Trachteszene, wahr gno u gschätzt wärde. D’Verbindige wo so dür üses Chleid entstöh si sehr wärtvoll u trage schliesslich o üses Bruchtum wieder nächer i die breiti Öffentlichkeit. Dr erst Schritt ufenang zue, wär dadrmit gmacht gsi. De isches drum gange o füf Froue ds finde, wo zäme dä Wäg i Agriff wei näh u sich onid vo allfällige Plattere lö la abschrecke. Us de beide Gruppe Wohle u Meikirch hani de vier Wägbegleiterinne gfunge u mir hei üs mit Freud a de Vorbereitige für dä Umzug beteiliget. Siebe Kilometer Marschmusig, dass si umgrächnet öppe zwöiehalb Stung marschiere u musige. Das muess zersch einisch probet u trainiert si. Beschwingten Schrittes hei mir üs im Summer äs paar Mau mit dr Musig i üsere Region ufe Wäg gmacht u hei Kilometer um Kilometer, Marsch um Marsch abgspuelet u wie fasch bim Tanze glehrt, die richtige Füess zum richtige Kommando mit dr richtige Schrittlängi ds näh. Was üs bsungers gfreut het, isch die grossi Ungerstützig wo mir us üsne eigete Gruppene erfahre hei. Bereitwillig hei üs mehreri Lüt ihri eigete Hube, Händschli, Täschli usw. usgliehe u hei üs mit Rat u Tat zur Siete gstange. So het sich’s ergäh, dass mir ono das Meitli, wo am Umzug mitem Täfeli und am Chutzli, em Maskottli vor Musig, vorab glüffe isch, ine eifachi Sunntigstracht hei chönne i chleide. Äs isch so stolz gsi, einisch ä Tracht dörfe ds Trage, dass äs sich’s nid het la näh, o d’Hube ds träge. O hie het wiederum d’Tracht u d’Freud a üsem Chleid ä ungloublich schöni Verbindig gschaffet. Stellet euch vor wie schön dass es isch, we dir zum Bispiu am Morge bim Alegge vo dr Tracht no hie äs zuesätzlichs paar Trachtesocke, da no paar Hotschguffe u dert no äs Ärmuböckli u ufem Handy ä Nachricht vo eune Trachtegruppemitglieder finget, wo drinne steit, dass sie hie u dert no paar Sächeli mit ipackt hei – für im Notfall, me heig da oscho eischlägegi Erfahrige gmacht, wies so chönn ga… Nach der Areis u am Ufglette vo de Trachtehemmli, hets de am Morge am haubi füfi Tagwach gä. No vorem Sunneufgang si mir abgholt worde. Tatsächlich hei mir i däm Ortschäftli ä Coiffeur gfunge, wo so verruckt isch gsi, wäge üs Ehredame am Morgen am füfi si Salon ufdstue u üs wunderschöni Frisure ds Flächte. Bimene Gipfeli, Kaffi umene Gläsli Champagner si die Hubene beguetachtet u d’Haar zu kunstvolle Frisure zwägbüschelet worde. Ufem Wäg nach Münche hei mir de im Festfüehrer no folgende Kommentar gfunge: «Ein musikalisches Highlight ist die Teilnahme der Musikgesellschaft Wahlendorf aus der Schweiz, die 1908 von Militärtrompetern aus dem Dorf Wahlendorf in der Nähe von Bern gegründet wurde. Heute musizieren 45 Aktivmitglieder im Alter zwischen 18 und 80 Jahren im Verein, der aktueller Seeländer- und Kantonal Berner Meister in der 3. Stärkeklasse Harmoniebesetzung ist. Die heute getragene Uniform ist eine «Gotthelf-tracht» und wurde 1980 angeschafft. Mit dabei sind fünf Trachtenfrauen, die eine Berner Festtagstracht tragen. Die rote Schürze und die üppige Verzierung des Silberschmuckes mit Ketten, Göllerblumen, Haften und Brusthaften zeigte Reichtum an.». Mit Hube, Händschli u Trachteblüemli bewaffnet hei mir de dr Wäg zu üsem Startplatz unger d’Füess gno. So hei mir doch vom Umzug o einiges gseh u üs vor allem a dä verschiedene Trachte vo Bayern und us andere Länder erfreut. A üsem Startplatz acho hei mir de chli Zyt gha die Trachte vo de angere o chli ds bewundere u unger d’Lupe ds näh. Schnäll hei sich Gspräch ergäh, wär de was fürne Tracht treit, warum me vore am Mieder Münzene agmacht het, us was üsi Hubene si und so wieter. So ungerschiedlich die Trachte ufe erst Momänt usgseh, desto meh Gmeinsamkeite hei sich bim gnäuere betrachte use gstellt. Mit hei sogar äs paar Froue i bayerische Trachte gfunge, wo eigentlich ds Züri ir Schwitz schaffe. Viellicht gseh mir die einti oder angeri sogar im Summer am eidgenössische Trachtefest. Nach langem Warte isches de ändlich los gange u nach der erste Kurve sie bereits d’Kameras vom Bayerische Rundfunk gstange. Lächle, strahle, dr richtig Fuess näh, d’Blueme so häbe, dass si o schön zur gältig chömme, ds Tämpo nid azieh u luege, dass mir uf eire Linie mitem Dirigänt und de Fähnriche blibt – was eim da alles düre Chopf schiesst. U de cha mes gniesse: D’Mönsche am Strasserand hei freud, chlatsche, winke u juble dr Musig zue. Sobald sie erkenne, dass mir us dr Schwitz sy chüschelets «aus der Schweiz… da waren wir letzthin in den Ferien» u de rüefe sie üs zue «Hopp Schwytz» u vo hie u dert tönts «Grüezi Schwytz». Äs isch äs tolls Erläbnis! Ad Füess u d’Druckstelle dänkt scho lang kenni meh vo üs u mir gniesse d’Innestadt vo Münche, winke dert u hie u lö üs vo de beschwingte Tön vor Musiggsellschaft Wahledorf bis zu üsem Ziel, dr Theresienwiese, la träge. Dir ahnets: Us de siebe Kilometer Marschmusigstrecki si am Schluss mit Platzsuechi u warte rund ds Dopplete worde. Das Erläbnis, die tolle Begägnige mit angerne Trachtelüüt u die vielfältige Verbindige wo mir dür üsi Tracht hei chönne neu chnüpfe, vertiefe oder festige hei aber alli Mal jedi Plattere a üsne Füess wett gmacht. Verfasserin: Iris Keller, Trachtengruppe Meikirch Ehrendamen Trachtengruppen Meikirch und Wohlen: Daniela Weber, Lisa Röthlisberger, Mirjam und Sarah Lindenmann, Iris Keller